الفترة دي كلنا أدركنا إن وجود ثروة سايلة أو إننا نحوش مبلغ معين مش كافي لضمان إن الفلوس دي تقدر تعتمد عليها بعدين، ولا حتى بإنك تحطها في البنك، لإن قيمة الفلوس نزلت الست شهور اللي فاتوا أكتر من ٥٠٪ على الأقل من قيمتها.
لذلك كلنا بدأنا نفكر في طرق تحفظ للفلوس دي قيمتها. أكتر الوسايل المتاحة والسريعة لتحقيق هدف زي ده هي تحويل الفلوس لعملة صعبة، أو دهب، أو عقارات. السؤال الحقيقي: نختار مين فيهم يحفظ فلوسنا؟
العملة الصعبة نقدر نستبعدها لصعوبة الوصول ليها في الوقت الحالي إلا بإجراءات معقدة وبكميات قليلة. يبقى الموضوع محصور في الدهب والعقارات — وإحنا جايين نقولك إن العقارات استثمار أذكى بكتير من الدهب:
- العقارات سعرها مبيقلش، ومعدلات ارتفاع أو هبوط أسعارها تعتبر ثابتة بنسبة كبيرة، على عكس الدهب اللي بيعتمد على حركة السوق وبيزيد ويقل بمعدلات كبيرة جدًا.
- العائد من العقارات أكبر من العائد من الدهب، لإن العقار مش بس بيحفظ قيمة الفلوس — هو كمان استثمار ممكن يزود في قيمتها عن طريق تأجيره بطرق مختلفة، وده شيء الدهب لا يمكن يوفره.
- خطر امتلاك دهب أعلى بكتير من خطر امتلاك عقار. العقارات استثمار آمن ومكان كبير وثابت بيحقق رضا عند المالك، بينما الدهب خطر سرقته أو فقدانه أعلى بشكل كبير.
عمومًا كل ده يتوقف على غرضك إنت من الاستثمار والطريقة اللي بتفضلها، لكن العقارات أكتر استثمار آمن في وقت مفيش فيه حاجة مضمونة.
